حصيله تجربة الميه الاوائل للشهاده السودانية
الناس بتختلف ااي لكن عسى ولعل تلقى حاجه بتنفع معاك في وحده من النصايح دي
1_ادي اي ماده حقها ومستحقها... م تركز علي ماده علي حساب ماده تانيه... الاسلاميه والعربي برفعو النسبه عشان كده م تهملهم...قوي علاقتك مع ربك وخلي ثقتك في نفسك كبيره وفي ربنا اكبر.. وكل ما تتعب وتزهج من القرايه اتذكر يوم النتيجه واللحظه الانت بتشوف فيها الرساله وتقرأ نسبتك وتلقاها ظابطه صدقني كل التعب حيروح لانو فرحه النجاح ما زيها
-مرات بتغلبك اجابه او اجابتين في الامتحان، م تخلي الحاجه دي تنفسن بيك وم تقدر تقرأ لباقي الامتحانات، كل الناس دي بتغلط م انت براك ونفس الامتحان الصعب دا امتحنو كل الناس يعني كلكم ممكن يعمل ليكم نفسيات بس ببقى الفرق بينكم بين واحد اتجاوز عشان م يأثر على باقي الامتحانات وبين واحد نفسن وم قدر يقرأ تاني، يعني لو غلبك امتحان بتستسلم وم تقرأ تاني؟!
نفترض دا م جبت فيهو نسبه كويسة، يلا عادي ممكن تجيب نسب ظابطه شديد في الباقيات وتعوض ليك، م تستسلم عشان حاجه زي دي، لانو لو ركزت مع الامتحان دا م ح تقرأ و بكده بتكون ضيعت تعب قرايتك كلو ، فكر كويس وانسي الفات وركز في القدامك وبس
سارة معاوية محجوب
الشيخ حمد بنات
96.9
2_القراية م كل شئ في الحياة و الضغط الزايد عن حده ممكن يخلي الواحد يكره الشي من اصله . برضو الواحد يرفه عن نفسه بس دا كلو في حدود المعقول يعني من غير م يهمل جوانب تانية . لازم نهتم بكل شي في حياتنا و ما نهمل جانب و نركز على التاني زي هواياتنا و اجتماعياتنا و ما نضيع شخصيتنا ال نحن بنحبها ابدا على اساس القراية أهم من ديل
احمد نصر الدين
الشيخ يوسف الدقير
96.7
3-
١-م تقارن نفسك بزول ركز مع نفسك بس وخلي هدفك الوحيد انك تنافس نفسك وتتخطى كل الحدود الكنت خاتيها لنفسك
٢-الدعاء يخوانا ادعو ادعو ادعو م تملو منو نهائي لانو ماف شي بعيد على ربنا خلوهو روتين ليكم عديل (انا للآن بدعي في صلاتي اني اتفوق واجيب درجه حلوة من شده م اتعودت )
٣-أكلو يخونا اكلو ما محتاجين توصيه صح
٤-لما تجي تقرا دايما خت المادة العندك فيها مشكله او الحاسيها صعبة في الأول لأنك طول م انت خايف منها او حاسيها صعبه م حتذاكرها ابدا فيها براحه براحه وفي النهاية حتكتشف انها مادة ساهلة وانك براك الكنت مكبر الموضوع
*اصبرو يخوانا وشدو حيلكم النجاح بستاهل والله
واتذكرو انو عوض الله اذا حل أنساك كل ما فقدت.... و (إنّ الله مع الصابرين)
منتقى آدم عبد القادر
اسماء عبد الرحيم
96.9
4-نصيحه
ثقتك بنفسك اهم حاجه لازم تخش اي امتحان وانت واثق انو مافي سؤال بقدر يقيف في طريقك
محمد دفع الله محمد
المعالي الثانوية الخاصه بنين
96.7
💙
5-
١- السهر عدو النجاح دة من وجهة نظري لانو برهقك نفسياا وجسدياا وخاصة لمن تساهر في مزاكرة لي امتحان فا حتمشي الامتحان مرهق وتعبان وماحتقدر تشتغل والأهم من المزاكرة بتاعت الامتحان هو التركييييز اثناء الامتحان ^انا كطالبة اثناء الامتحان التجريبي لمادة الكيمياء ساهرت لحد الساعه4 علشان اخلص الكتاب العبارة عن 400 صفحة وماكان عندي يوم اوف وجبت 83 دة نظرا لي انو دخلت تعبانة وما مركزة ومنها تاني ماساهرت نهائي وحتى لي الشهادة ما ساهرت في الكيمياء فا دخلت مرتاحة ذهنيا والحمدلله احرزت فيها 98
٢-ما تزاكر وانت زهجان أو ما عندك نفس للقراية لانو قراية الدفس البدون نفس ما بتجيب نتيجة نهائياا أهم شئ لمن تبدأ تزاكر إنك تكون مرتاح ذهنيا وجسدياا .وكلنا عارفين انو تالتة دي مرهقة للطالب جسديا ونفسيا خاصة ايام الامتحانات .وفي ناس بتتأثر وتنفسن بي درجاتها في امتحانات المدرسة ،فا بحب اقول لكم درجاتكم دي خلوها دافع لكم علشان تجيبوا افضل منها في الشهادة(وهو الأهم طبعا) لانو امتحاناتك بتاعت المدرسة دي ماح تدخلك جامعه او تطلعك من جامعه ودة ما معناه انو الناس تهمل امتحانات المدرسة، لالا اعتبروا انو امتحانات المدرسة دي بروفه لي امتحان الشهادة وكل ما امتحنتوا كتير في المدرسة كلما زاد ثباتك وانت
٣-خليكم قريبين من ربنا وأدعوا كتير وألحوا في الدعاء فإن الله يحب العبد اللحوح وح أقول ليكم دعوة أنا دائما كنت بدعي بها في كل سجود وبين كل اذان واقامة لدرجة انها طوالي بقت في لساني حتى بعد نتيجتي طلعت بلقى نفسي مرات في السجود بدعي بها ويلي هي ( *اللهم إني أسألك نسبة تليق بقدرك وعظمتك* ) وفعلا الحمدلله قدره عظيم وجليل وجبت 97.1 %
٤-بالنسبة لي تحديد الأهداف وكدة في كلمة SMART أكيد بتكونوا سمعتوا بها ولو ماسمعتوا بها ما مشكلة ح أديكم عنها فهم .هي أصلا بقولوا عليها الهدف الذكي يعني لمن تجي تختار هدفك خت الحاجات دي قدامك وهي اصلا اختصار لي كلمات ويلي هي :
1-Specific(محدد)
خلي هدفك وطموحك يكون هدف محدد ودقيق وواضح
2-Measureable(قابل للقياس)
هدفك البتوضعوه يكون عندك المقدرة عل
